الحلوياتالمطبخ الأمريكى
ساندويتش الآيس كريم
من ألذ و أشهي الحلويات التى يعشقها الاطفال خاصة
الوقت :
وقت التحضير : 15 دقيقة وقت الطهي : 15 دقيقة الوقت الكلى : 30 دقيقة عدد الاشخاص :5
الادوات المستخدمه :وعاء معلقة صينية مضرب كهربائى خلة الاسنان
المقادير
- 2 عدد صفار بيضة
- 2 كوب دقيق
- 1 ½ كوب سكر
- 1 كوب ايس كريم (النوع اللي تفضليه)
- 1 كوب زبدة
- 1 معلقة صغيرة فانيليا
- ½ كوب كاكاو
- ¼ معلقة صغيرة ملح
الخطوات
- هنسخن الفرن على درجة حرارة 180
- هننخل الدقيق والكاكاو والملح كويس فى بولة ونسيبهم على جنب.
- فى بولة تانية هنضرب السكر والزبدة كويس بمضرب بيض كهربائى لحد ما يتجانسوا كويس.
- هنضيف صفار البيض والفانيليا لخليط الزبدة مع الاستمرار فى الخفق لحد ما الخليط يتجانس تماما.
- هنخفض سرعة المضرب ونستمر فى الخفق مع اضافة الدقيق بالتدريج لحد ما العجين يتماسك كويس وبعد كده هنقسم العجينة نصفين و نشكلهم على شكل مستطيل.
- هنلف العجين فى بلاستيك ويدخل الثلاجة لمدة 20 دقيقة.
- هنفرد العجين بالنشابة ونقطعه على شكل مستطيلات.
- باستخدام عود خشبى (خلة) هنعمل ثقوب فى العجين على مسافات متساوية.
- هنرص قطع العجينة على ورق زبدة فى صينية وتدخل الفرن على درجة حرارة 180 لمدة 15 دقيقة.
- بعد ما يخرج البسكوت من الفرن هنسيبه يبرد شوية وننقله فى طبق ونسيبه يبرد تماما.
- باستخدام سكينة حادة هنقسم الأيس كريم لقطع مستطيلة بنفس حجم قطع البسكوت وهنضيف طبقة من الأيس كريم بين طبقتين من البسكوت لعمل الساندويتش.
- هنلف كل ساندويتش بالبلاستيك ويدخل الفريزر لمدة نصف ساعة وبعدها يقدم.. بالهنا والشفا.
