الحلوياتالمطبخ الأمريكى
تشيز كيك
طريقة سهلة ولذيذة لعمل تشيز كيك على البارد
الوقت :
وقت التحضير : 8 ساعات وقت الطهي : الوقت الكلى : 8 ساعات عدد الاشخاص :10
الادوات المستخدمه :معلقة خشب خلاط صينية كبيرة
المقادير
- 24 عدد جبنة كيري (مكعبات)
- 3 معلقة كبيرة زبدة
- 3 معلقة كبيرة عسل نحل
- 1 برطمان كريز (مسكر)
- 1 كيس جيلاتين بودر
- 1 باكو بسكوت (دايجيستيف كبير)
- 1 كوب كريمة مخفوقة
- ½ كوب ماء (ساخن)
- ½ كوب مربى (كريز أو أى نوع آخر)
- ½ كوب سكر
- ½ كوب زبادي
الخطوات
- أولا, لازم الجبنة الكيرى والزبدة يكونوا فى درجة حرارة الغرفة, يفضل اخراجهم من الثلاجة قبل عمل الكيكة بفترة كافية
- فى الخلاط هنضيف البسكوت والزبدة وعسل النحل ونضربهم كويس جدا لحد ما القوام يتماسك, من 10 ل 20 ثانية
- هنجيب صينية بطوق (الجوانب بتتربط وتتفك بمشبك سوستة) وهنضيف خليط البسكوت ونضغطه ونساويه كويس جدا بمعلقة خشب مسطحة.
- هندخل الصينية الثلاجة لمدة ساعتين علشان البسكوت يمسك كويس جدا ويشكل قاعدة متماسكة.
- هندوب كيس الجيلاتين فى نصف كوب ماء ساخن ونسيبه يبرد.
- بعد كده فى بولة كبيرة هنضيف مكعبات الجبنة الكيرى ونضربها كويس بمضرب كهربائى لحد ما يصبح قوامها ناعم.
- هنضيف الزبادى والسكر ونضرب تانى بالمضرب الكهربائى لحد ما الخليط يتجانس.
- هنضيف الجيلاتين ونضرب كويس جدا
- فى الأخر هنضيف الكريمة المخفوقة وهنقلبها يدويا بالمعلقة لحد ما تختلط كويس بالجبنة.
- هنصب خليط الجبنة فى الصينية على البسكوت ونساويه وندخل الصينية الثلاجة مرة أخرى ولمدة 6 ساعات.
- بعد كده فى طاسة على النار هنضيف المربى والكريز بعد تصفيته من الشراب وهنقلبهم كويس لمدة 3 دقائق وبعدين نسيبهم يبردوا
- هنزين وجه الكيكة بالمربى والكريز وهنشيل الطوق بتاع الصينية وكده ال تشيز كيك جاهزة للتقديم.. بالهنا والشفا
